ហង្សមាសមានអ្វីកើតឡើងបានជាទាំងថ្នាក់ដឹកនាំនិងតារាចម្រៀងនាំគ្នាចេញជាបន្តបន្ទាប់?

តាំងពីដើមឆ្នាំ២០១៦មកដល់ពេលនេះ គេសង្កេតឃើញថាប្រជាប្រិយភាពរបស់ផលិតកម្មហង្សមាសហាក់ស្ទុះឡើងខ្លាំងឈានមុខគេឡើងវិញ បន្ទាប់ពីបាត់បង់ដំណែងនេះទៅផលិតកម្មសាន់ដេជាច្រើនឆ្នាំមក។កត្តាដែលការគាំទ្រមកលើផលិតកម្មនេះត្រលប់មកវិញ គឺដោយសារតែតារាចម្រៀងថ្មីៗចូលជាច្រើន ដែលពួកគេសុទ្ធសឹងជាបេក្ខជនក្នុងការប្រលងចម្រៀងលំដាប់ថ្នាក់ពិភពលោកដែលរៀបចំដោយហង្សមាសផ្ទាល់។

ការបើកផ្លូវអោយតារាចម្រៀងចូលកាន់តែច្រើន ធ្វើអោយហង្សមាសក្លាយជាផលិតកម្មដែលមានអ្នកចម្រៀងច្រើនបំផុតក្នុងប្រទេស។ស្របពេលជាមួយតារាចម្រៀងកាន់តែច្រើន គេសង្កេតឃើញពាក្យចចាមអារ៉ាមក៏កាន់តែច្រើន ពីការកើតទុកមិនសុខចិត្តរបស់តារាចម្រៀងរួមដំបូងតែមួយ ប៉ុន្តែបែរជាអ្នកខ្លះមានបទច្រើនស្ទើរច្រៀងមិនអស់ ចំណែកអ្នកខ្លះទៀតពីរ បីខែស្ទើរមិនទាន់ចេញមួយបទ។ហើយមកទល់ពេលនេះតារាចម្រៀងល្បីៗជាច្រើនសុទ្ធមានបំណងចង់ចាកចេញ ចំណែកអ្នកខ្លះក៏ចេញមកហើយ ដោយសារតែឆ្អែតចិត្តពីភាពលំអៀងមិនផ្ដល់ឱកាសនិងដំណោះស្រាយ។ជាក់ស្ដែងតារាចម្រៀង កញ្ញាឈិត សុវណ្ណាបញ្ញា ក្រោយពីជ្រកកោនក្នុងផលិតកម្មនេះ១១ឆ្នាំ ពេលនេះឈិត សុវណ្ណបញ្ញាបានប្រកាសដើរចេញពីហង្សមាសហើយ បន្ទាប់ពីកញ្ញារង់ចាំអស់រយះពេលជាង១០ឆ្នាំ ហង្សមាសមិនដែលយកចិត្តទុកដាក់បញ្ចេញបទល្អអោយច្រៀង និងសូម្បី តែអាល់ប៊ុមទោលមួយម្នាក់ឯងក៏កញ្ញាមិនបានទទួល ស្របពេលដែលតារាស្រីផ្សេងទើបតែចូល ក៏ហង្សមាសខំប្រឹងបញ្ចេញអាល់ប៊ុមទោលអោយនោះ។

មិនខុសគ្នាប៉ុន្មានពីបញ្ញា សូម្បីអ្នកនាងយក់ ថិតរដ្ធាក៏បានបោះពាក្យថានឹងដើរចេញដែរ បន្ទាប់ពីគាត់តែងត្រូវហង្សមាសមើលរំលងទាំងបទចម្រៀង ការសម្ដែងតាមខនសឺត រួមទាំងការចេញមុខក្នុងកម្មវិធីធំៗនេះ ខណៈ គាត់ជាតារាចម្រៀងម្នាក់ដែលពោពេញទៅដោយបទពិសោធនិងសមត្ថភាពតែបែរជាមិនត្រូវបានគេលើកស្ទួយដូចតារាចម្រៀងច្រៀងមិនច្បាស់ទៅវិញ។

ងាកមកចាប់អារម្មណ៍នឹងកញ្ញា ស៊ុន ស្រីពេជ្រវិញរឹតតែមិនខុស ពីអ្នកនាងយក់ ថិតរដ្ធា។តារាចម្រៀងបទបែបមនោសញ្ចេតនាម្នាក់នេះ អះអាងថានឹងដើរចេញទៅរកទ្រនំថ្មី បើសិនជាផលិតកម្មហង្សមាសនៅតែមើលរំលងខ្លួន ហើយមិនផ្ដល់ដំណោះស្រាយសមរម្យណាមួយនោះ។

អស់ពីតារាចម្រៀងក៏រឹតតែភ្ញាក់ផ្អើលដែរ ដោយសារតែអ្នកគ្រប់គ្រងជាន់ខ្ពស់របស់ហង្សមាសលោក អ៊ិន ទីតូទើបតែប្រកាសថាគាត់បានដើរចេញពីហង្សមាសដែលគ្រប់គ្រងអស់រយះពេល៩ឆ្នាំមកនេះ ហើយពេលនេះគាត់ក៏បានចូលមកកាន់ការងារក្នុងផលិតកម្មថោនវិញ។ចំពោះហេតុផលវិញលោកគ្រាន់តែលើកឡើងថាចង់ផ្លាស់ប្ដូរបទពិសោធន៍ការងារនៅកន្លែងថ្មីប៉ុណ្ណោះ។ប៉ុន្តែទោះជាយ៉ាងណាយើងគ្រប់គ្នាដឹងហើយថាគ្មាននរណាម្នាក់ចាកចេញពីកន្លែងដែលខ្លួនបានរស់នៅកសាងខ្លួននោះទេ បើសិនជាមិនមានរឿងអ្វីធំដំ ឆ្អែតចិត្តនោះ៕

ដោយ: Tea