បុណ្យចូលឆ្នាំប្រពៃណីខ្មែរ ប៉ុន្តែខ្មែរខ្លួនឯងពេញនិយមវប្បធម៌បែកស្លុយហុយដី

ភាពដដែលៗជាសត្រូវរបស់ទស្សនិកជន នេះជាអ្វីដែលអ្នកក្នុងរង្វង់សិល្បៈតែងតែនិយាយពេលចេញមុខតាមព័ត៌មានម្ដងៗ។ដូច្នេះគេតែងធ្វើអ្វីប្លែកៗ រហូតដល់ប្លែកទៅប្លែកទៅចាកឆ្ងាយគំនូសព្រំដែន។ជាក់ស្ដែងពិធីបុណ្យចូលឆ្នាំខ្មែរ ដែលជាបុណ្យប្រពៃណីពីដូនតា ដែលធ្លាប់តែប្រារព្ធឡើងព្រមជាមួយការរាំកម្សាន្តចង្វាក់ប្រជាប្រិយខ្មែរ ស្ទើរតែគ្មានទៀតទេរយះពេល២ ៣ឆ្នាំចុងក្រោយនេះ។ប្រជាជនខ្មែរភាគច្រើនជាពិសេសយុវវ័យផ្ទាល់ស្ទើរតែភ្លេចចង្វាក់ប្រជាប្រិយខ្មែរ ហើយទៅជាពេញនិយមបទរាំរញ៉េរញ៉ៃ គេហៅថារាំកូរអីណាទៅវិញ។ចំណែកផលិតកម្មវិញដើម្បីតម្រូវចិត្តអ្នកទិញដែលភាគច្រើនជាយុវវ័យ ក៏ងាកមកផលិតបទចម្រៀងរាំញាក់បែបRemix ច្រើនជាងបទរាំវង់ សារ៉ាវ៉ាន កន្ទ្រឹមទៅវិញ។ ចំណែកតារាចម្រៀងដើម្បីបានល្បីបទខ្លួនក្នុងរដូវចូលឆ្នាំ សុខចិត្តតែងខ្លួន និងរាំញាក់ញ័រស្ទើរឆ្កួតបាត់អស់ជាចរិតរបស់ខ្មែរដែលទន់ភ្លន់។

ប្រសិនបើការធ្វើបែបនេះនៅតែបន្ត ហើយប្រជាជនខ្មែរនៅតែបន្តគាំទ្រ សកម្មភាពយកសិល្បៈទម្រង់បរទេសមកលាយជាមួយបុណ្យប្រពៃណី មិនយូរទេក្មេងៗជំនាន់ក្រោយដែលលឺតែបទញាក់រញ៉េរញ៉ៃពេលចូលឆ្នាំ នឹងគិតថាវាជាចង្វាក់ប្រពៃណីខ្លួនដែរជាក់ជាមិនខាន។

នៅពេលនេះមនុស្សគ្រប់គ្នានៅមិនទាន់ឃើញពីផលអាក្រក់របស់វាទៅថ្ងៃមុខ ទើបមានហើយមិនចេះថែរក្សា។ជឿថាអ្នកទាំងអស់គ្នាមិនទាន់ភ្លេច នៅពេលមានពាក្យចចាមអារ៉ាមថាប្រទេសជិតខាងមានបំណងដាក់ល្ខោនខោលជារបស់គេនោះ កូនខ្មែរជាពិសេសនៅក្នុងបណ្ដាញសង្គមហាក់ដូចជាការពារណាស់ ខ្លាចបាត់បង់ណាស់ ខឹងគេណាស់ដែលចង់មកដណ្ដើមរបស់ខ្លួន មានដល់ថ្នាក់ជេរគេ ដៀមដាមដល់ប្រព័ន្ធផ្សព្វផ្សាយ ដែលមិនដែលធ្វើសកម្មភាព។ប៉ុន្តែក្រោយមកក៏មានស្ថានីយទូរទស្សន៍ក្នុងស្រុកមួយបានផលិតល្ខោនខោលនេះដើម្បីចាក់ផ្សាយ ប៉ុន្តែបែរជាមិនសូវមានអ្នកទស្សនាទៅវិញ។

ពេលនេះក៏មិនខុសគ្នាដែរ អ្នកអាចនឹងភ្លេចគិតពីចង្វាក់រាំរបស់ខ្មែរ អ្នកអាចនឹងរវល់ជក់ខ្យល់បែកស្លុយបែបអាវាសែ ប៉ុន្តែបើសិនថ្ងៃណាមួយប្រទេសដទៃយកវាទៅថែរក្សាយកជាចុះជាសម្បត្តិរបស់គេ។សូមកុំខឹងគេ កុំស្អប់គេ កុំជេរគេ ព្រោះវាជាកំហុសរបស់យើងដែលមិនចេះថែរក្សា។សង្ឃឹមថាអ្នកអានអត្ថបទនេះរួច ចូលរួមអបអរសាទរបុណ្យចូលឆ្នាំប្រពៃណីជាតិខ្មែរ វប្បធម៌ដ៏ល្អផូរផង់នេះ ជាមួយចង្វាក់រាំវង់ រាំក្បាច់ សារ៉ាវ៉ាន់ ឡាំលាវ កន្ទ្រឹម តាលុង ចូកកំពឹស ហើយកាត់បន្ថយរាំញ័រញាក់ គ្រវីដៃជើង រញ៉េរញ៉ៃទាំងអស់គ្នា៕