ក្រោយចាកចេញពីហង្សមាស យក់ ឋិតរដ្ឋា ដឹកដៃ ឈិត សុវណ្ណបញ្ញា និងកីឡាករជម្រើសជាតិចូលថោន

បន្ទាប់ពីការប្រកាសសម្រេចចិត្តចាកចេញយ៉ាងភ្ញាក់ផ្អើលពីផលិតកម្ម រស្មីហង្សមាស មិនបានប៉ុន្មានផង ឥលូវនេះ អ្នកនាង យក់ ឋិតរដ្ឋា បានដឹកដៃ ឈិត សុវណ្ណបញ្ញា ទៅកាន់ផលិតកម្មថ្មីនោះគឺ ផលិតកម្ម ថោន។

នៅលើទំព័រហ្វេសប៊ុកស្វាមីរបស់អ្នកនាង យក់ ឋិតរដ្ឋា លោក ឃុំ ប៊ុណ្ណាដែត ក៏បានសរសេរកាលពីទាបភ្លឺថ្ងៃនេះថា "អរគុណដល់ក្រុមការងារផលិតកម្មថោន ដែលបានយកចិត្តទុកដាក់ដល់ភរិយារបស់ខ្ញុំ ក្នុងការថតបទសំរាប់ត្រៀមចូលឆ្នាំខ្មែររបស់យើងខាងមុខ។" នេះសបញ្ជាក់ឱ្យដឹងថា អ្នកនាង យក់ ឋិតរដ្ឋា ពិតជាចូលទៅផលិតកម្ម ថោន មែន ។ ជាមួយគ្នានេះ ក៏ឃើញលោក ឃុំ ប៊ុណ្ណាដែត បង្ហោះរូបអ្នកនាង យក់ ឋិតរដ្ឋា ថតជាមួយលោក អ៊ិន ទីតូ ដែលបានចាកចេញពីហង្សមាសចូលថោនថ្មីៗនេះដែរ និងជាមួយកញ្ញា ឈិត សុវណ្ណាបញ្ញាដែលបានរួមគ្នាចូលថតបទចម្រៀងចូលឆ្នាំខ្មែរឱ្យផលិតកម្ម ថោន។

បន្ថែមពីតារាចម្រៀងថ្មីទាំង២នេះ ផលិតកម្ម ថោន ក៏នៅមានតារាចម្រៀងថ្មីជាកីឡាករបាល់ទាត់ជម្រើសកម្ពុជារួមមានលោក ឈិន ឈឿន, អ៊ុំ សេរីររ័ត្ន, ច្រឹង ពលរដ្ឋ និង កែវ វណ្ណៈ ដែលបានបកស្រាយបទចម្រៀងរួមគ្នា។

អត្តបទ៖ តុលា