ហេតុអ្វីហង្សមាសលើកនី រតនាខ្លាំងជាងប៊ុត សីហានិងធែល ថៃដែលលើកពានដូចគ្នា?

លើកពានដូចគ្នា ប៉ុន្តែការលើកតម្កើងមិនដូចគ្នាឡើយ នេះជាការយល់ឃើញរបស់ទស្សនិកជន ជាពិសេសអ្នកគាំទ្រប៊ុត សីហានិងធែល ថៃតែម្ដង។ជាមួយការយល់ឃើញនេះ វាមិនខុសនោះទេព្រោះមិនថាការចេញបទចម្រៀង ការឡើងឆាកតន្ត្រីធំៗរបស់ហង្សមាស គឺមិនដែលបាត់មុខនី រតនាឡើយ ខណៈដែលយូរៗម្ដងទើបគេឃើញលេចវត្តមានធែល ថៃនិងប៊ុត សីហាឡើងឆាកច្រៀងនឹងគេ។ចំណែកបទចម្រៀងថ្មីៗនិងល្អៗ គេសង្កេតឃើញថាប៊ុត សីហាហាក់ដូចជាសូវទទួលបានសោះតែម្ដង។

ជាមួយនឹងចម្ងល់នេះ មានអ្នកខ្លះឆ្ងល់ថាហេតុអ្វីបានជាហង្សមាសហាក់ដូចជាយកចិត្តទុកដាក់លើម្ចាស់ពានCambodian Idolរដូវកាលទី១ ខ្លាំងជាងម្ចាស់ពានThe Voice ទាំងរដូវកាលទី១និងទី២?ឬក៏តម្លៃពានCambodian Idolមានតម្លៃជាងThe Voiceទាំងដែលទាំងពីរកម្មវិធីហង្សមាសផលិតដូចគ្នាសោះ?

ស្រាយនឹងចម្ងល់នេះក៏មានអ្នកយល់ឃើញថាការដែលហង្សមាសលើកនី រតនាអោយកប់គឺមកពីនី រតនាចាប់ចំលេខសំណាងប៉ុណ្ណោះ។លេខសំណាងគឺថាក្រោយពីម៉ៅ ហាជី សៅ ឧត្តម សុវណ្ឌី ធារិកា រួមទាំងអៀម វន្នីមិនចូលច្រៀងអោយហង្សមាស ហើយងាកទៅរកទ្រនំផ្សេងៗរៀងៗខ្លួន។

ហេតុដូច្នេះទើបហង្សមាសក្ដៅស្លឹកត្រចៀកនិងលើកនី រតនាដោយបញ្ចេញបទល្អៗ ព្រមទាំងដាក់អោយច្រៀងស្ទើរតែគ្រប់ឆាកតន្ត្រីតាមបណ្ដាខេត្តដើម្បីប្រមូលការគាំទ្រអោយល្បីខ្លាំងជាងអ្នកដែលចាកចេញទៅទ្រនំផ្សេងព្រោះថាបើសិនជាម៉ៅ ហាជី សៅ ឧត្តម និងអៀម វន្នីល្បីជាងនី រតនានោះហង្សមាសនឹងបាក់មុខមិនខាន ពីព្រោះពួកគេជាគូប្រៀបធៀបក្នុងក្រសែភ្នែកមហាជនដែលចាំមើលថាតើរវាងអ្នកនៅនិងអ្នកសម្រេចចិត្តមិនចូលហង្សមាសមួយណាមានកេរ្តិ៍ឈ្មោះនិងបទល្បីជាងនៅថ្ងៃក្រោយ។ដូច្នេះចង់មិនចង់ក៏ត្រូវសម្រុកបទល្អៗដែរដើម្បីរក្សាកេរ្តិ៍ឈ្មោះតារាចម្រៀងកំពូលសំណាងនេះមិនអោយចាញ់អ្នកចេញ។នេះក៏ជាហេតុផលមួយដែល ប៊ុត សីហានិងធែល ថៃត្រូវធីបចោលនៅមួយដុំសិនដោយមិនទទួលបានការជ្រោមជ្រែងខ្លាំងដូចនី រតនានោះទេ ព្រោះពួកគេគ្មានអ្នកត្រូវចាំប្រៀបធៀប។ទោះយ៉ាងណាការពិតក៏គ្មានអ្នកណាដឹងច្បាស់នោះឡើយ ថាអាចមានហេតុផលផ្សេងពីនេះឬយ៉ាងម៉េច ប៉ុន្តែហេតុផលមួយនេះក៏វាអាចទទួលយកបាននឹងសមហេតុផលដែរ៕

ដោយ:ធីម