សុគន្ធ នីសាឆក់តំណែងផ្ទួនៗពីឱក សុគន្ធកញ្ញា

អ្នកទាំងអស់គ្នាប្រាកដជាបានដឹងហើយអំពីគម្រោងនៃការផលិតរឿងភាគរបស់ស្ថានីយទូរទស្សន៍ហង្សមាស ដែលបានចុះផ្សាយកន្លងមក ដោយត្រៀមយកតារាចម្រៀងរបស់ខ្លួនធ្វើជាតួឯកតែម្ដង។ ហើយអ្វីដែលអ្នកគាំទ្រចង់បាននោះគឺជាដៃគូដ៏ស័ក្ដិសមបំផុត ដែលត្រូវគេរំពឹងទុកថា នឹងបង្ហាញខ្លួនក្នុងរឿងភាគដំបូងសម្រាប់ចាក់ម៉ោងមាស បន្ទាប់ពីទូរទស្សន៍មួយនេះគ្មានកម្មវិធីដែលផលិតដោយខ្លួនឯងក្រៅពីកម្មវិធីព័ត៌មានអស់រយៈពេលមួយឆ្នាំជាងមកហើយ។ មួយគូនោះគ្មានទៅណាឆ្ងាយពី ឆន សុវណ្ណរាជ និង ឱក សុគន្ធកញ្ញាឡើយ ដោយសារតែពួកគេមិនត្រឹមជាដៃគូស័ក្ដិសមក្នុងការច្រៀងប៉ុណ្ណោះទេ ប៉ុន្តែក៏មានពាក្យចចាមអារ៉ាមថាបានលួចបង្កើតស្នេហាជាមួយគ្នាទៀតផង។

ប៉ុន្តែអ្វីដែលអ្នកគាំទ្រភ្ញាក់ផ្អើលយ៉ាងខ្លាំងជាមួយប្រភពព័ត៌មានដ៏គួរឱ្យជឿជាក់មួយបានផ្សាយថា សុគន្ធ នីសាទៅវិញទេដែលជាតួឯកជាមួយលោក ឆន សុវណ្ណរាជ មិនមែនជា ឱក សុគន្ធកញ្ញា ដូចដែលយើងចង់បានឡើយ។

គួរកត់សម្គាល់ថា តាំងពីវិលចូលហង្សមាសវិញ សុគន្ធ នីសា ហាក់ត្រូវបានយកចិត្តទុកដាក់ និងលើកស្ទួយយ៉ាងខ្លាំង មិនថាទាំងបទចម្រៀង ឬការសម្ដែងតាមខនសឺតនោះទេដោយឆក់យកតំណែង ឱក សុគន្ធកញ្ញា ដែលធ្លាប់តែជាតារាលេចធ្លោជាងគេបំផុតរបស់ហង្សមាស។ ជាក់ស្ដែងបទចម្រៀងរបស់ សុគន្ធ នីសា ចេញជាបន្តបន្ទាប់ដោយចាប់ដៃគូជាមួយកំពូលតារាចម្រៀងប្រចាំផលិតកម្មរួមមានលោក ព្រាប សុវត្ថិ និង ឆន សុវណ្ណរាជទៀតផង ស្របពេលដែលតារាចម្រៀងជាច្រើនមិនទាន់បានចេញមួយបទសោះ។

អត្ថបទ៖ TEA