យឹម តាស្រង់ កោតសរសើរអ្នកនាង ចេន សាយចៃ ថាចេះគោរព និងផ្ដល់តម្លៃលើការងារ

អ្នកនិពន្ធបទចម្រៀងដ៏ល្បីប្រចាំផលិតកម្ម ថោន លោក យឹម តាស្រង់ បានបញ្ចេញមតិលើទំព័រហ្វេសប៊ុករបស់ខ្លួនកាលពីព្រលឹមថ្ងៃនេះ ភ្ជាប់ជាមួយវីដេអូទូរទស្សន៍ថៃ Thai PBS និយាយអំពីអ្នកនាង ចេន សាយចៃ ដែលបានថតអំឡុងបុណ្យចូលឆ្នាំខ្មែរក្នុងព្រឹត្តិការណ៍អង្គរសង្ក្រាន្តលើទឹកដីសៀមរាបអង្គរ ដោយកោតសរសើរចំពោះអ្នកនាង ចេន សាយចៃ តារាចម្រៀងមកពីខ្មែរសុរិន្ទ ដែលបានជ្រកកោននៅផលិតកម្ម ថោន ជិត២ឆ្នាំមកហើយ ថាជាតារាចម្រៀងចេះគោរព និងផ្ដល់តម្លៃខ្ពស់ចំពោះការងារ។

លោក យឹម តាស្រង់ បានសរសេរថា៖ "ឃើញទូរទស្សន៍ថៃមួយនិយាយអំពីតារាចម្រៀង ចេន សាយចៃ ថ្ងៃនេះខ្ញុំក៏មានពាក្យពេជន៍ចង់និយាយខ្លះដែរ!! និយាយអំពីវត្តមានតារាស្រីជួរមុខរបស់ខ្មែរសុរិន្ទបងស្រី ចេន សាយចៃ ដែលចូលមកជាសមាជិកផលិតកម្ម ថោន កាលពី២ឆ្នាំមុននោះ ស្របពេលដែលផលិតកម្មចម្រៀងទំាងអស់កំពុងទទួលរងនូវការរិះគន់រឿងបទចម្លង បើតាមខ្ញុំចំាថ្ងៃមួយនោះ ជាថ្ងៃដែលខ្ញុំបានជួប និងជជែកលេងជាមួយគាត់ថ្ងៃដំបូង និងស្វែងយល់អំពីការធ្វើការងារជាមួយគ្នា។ គាត់ និងគ្រួសារគាត់ជាមនុស្សដែលមានឆន្ទះចង់ផ្តោតលើការច្រៀងតែបទនិពន្ធថ្មី ស្របពេលដែលយើងមានឆន្ទះចាប់ផ្តើមដូចគ្នានាពេលនោះ ប៉ុន្តែខ្ញុំបានស្នើអោយគាត់ច្រៀងបទមរតកដើមមួយចំនួនដែលយើងមិនកែភ្លេង មិនកែប៉ារ៉ូល (រក្សាលំនំាដើម) ព្រោះខ្ញុំគិតថាបទមួយចំនួនគាត់ច្រៀងបានល្អ។ បន្ទាប់ពីធ្វើការជាមួយគ្នាបាន២ឆ្នាំមកនេះ ខ្ញុំសង្កេតឃើញថា គាត់ជាតារាចម្រៀងដែលពោរពេញទៅដោយសមត្ថភាពខ្លាំងក្នុងការច្រៀងលើសពីអ្វីដែលខ្ញុំបានគិត និងធ្លាប់ Control តារាចម្រៀងជាច្រើនកន្លងមកនៅក្នុង Studio ច្រៀង ហើយមួយវិញទៀតចំពោះការងារគឺគាត់គោរពពេលវេលា អោយតម្លៃក្រុមការងារ ចេះខ្លាចចិត្តអ្នករួមការងារ ចេះស្តាប់ទទួលយកយោបល់ពីក្រុមការងារ មានភាពស្មោះត្រង់ និងមានគំនិតចង់ឃើញកន្លែងការងារល្អជាងទីណាទំាងអស់។ មានពេលខ្លះខ្ញុំចង់អោយតារាពន្លកក្រោយៗមួយចំនួនបានស្គាល់គាត់ និងមើលគំរូអំពីគាត់នូវអត្ថចរិតធ្វើការងារក្នុងពិភពសិល្បៈ។ ហើយខ្ញុំសុំអរគុណដល់បងប្អូនទំាងអស់ដែលតែងគាំទ្រតារាចម្រៀង ចេន សាយចៃ ក៏ដូចជាគំាទ្របទនិពន្ធថ្មីរបស់ផលិតកម្ម ថោន ទំាងអស់ ពួកយើងនៅតែខិតខំបន្តរិះរកអ្វីដែលថ្មីៗមកបង្ហាញជូនបងប្អូនកំសាន្តជាបន្តទៀត។"

នៅក្នុងន័យខាងលើ លោក យឹម តាស្រង់ក៏បានរិះគន់ដល់តារាចម្រៀងពន្លកក្រោយផងដែរ ដែលមិនចេះផ្ដល់តម្លៃលើការងារឱ្យយកគំរូតាមបងស្រីចេន សាយចៃ៕
អត្ថបទ៖ តុលា